[160418] 貨幣戰下半場開波




各國滙率政策之風向已經轉變。兩次G20會議有明顯分別,2月上海G20會議後,20國聯合表態唔會頂爛市,曾經令人懷疑係咪好似1985年咁,有枱底下講掂數之《廣場協議》。事隔一個半月,喺美國華盛頓IMF總部開嘅另一次G20會議,陸續有國家表示唔想自國貨幣升值。上海G20會議後,市場揣測各國滙率唔頂爛市,即係封底,所以多國貨幣同步轉強;華盛頓G20會議後,開始有國家出聲唔想自國貨幣再升值,即係封頂。但由於有上海G20聲明在前,各國貨幣立即大貶機會唔大,會橫行拉鋸一段時間,類似期權炒鐵蝴蝶情況,直到有人偷步。

新加坡唔係G20成員,但係亞洲區最重要嘅金融中心之一。貨幣穩定有利金融中心地位,因可慳番唔少交易成本,就好似去賭場如果籌碼兌換率日日大上大落點玩?所以新加坡嘅貨幣政策唔常郁,郁親都係外圍環境有大變動,例如08年金融海嘯。近日新加坡出手唔畀坡紙再升值,日本多次出聲關注日圓升值問題,連本來話人民幣冇貶值基礎嘅中國,亦開始轉口話人民幣高估。

據《金融時報》報道,中國人民銀行行長周小川接受《財新周刊》訪問時,提到人民幣指數被高估12%。另據《路透》報道,中國人民銀行副行長易綱亦開聲講唔希望人民幣被嚴重高估。一個講唔夠,要正副行長兩個一前一後出聲,就係驚你唔明,準備做嘢。

衡量一隻貨幣有冇被高估,最常用嘅方法係瑞典經濟學家Gustav Cassel提出的購買力平價。購買力平價嘅原理,簡單地講,就係兩國貨幣雖然喺國際間滙率唔同,但折算成買一件貨嘅購買力時,應該差唔多。典型如巨無霸指數,香港一個巨無霸約20蚊,美國一個巨無霸約5美元,俄羅斯一個巨無霸約90盧布。理論上20港元應該等於5美元,同時等於90盧布,如滙率大幅偏離購買力,就係被高估或低估。但認真睇就發覺唔對路,唔同國家經濟發展程度唔同,美國紐約賣嘅巨無霸亦會貴過華盛頓,因為地價、人工、運輸成本,乃致國人喜好唔同等。所以購買力平價理論再深入研究落去,慢慢演化出均衡匯率理論。其中一種均衡匯率理論係行為均衡匯率(Behavioural Equilibrium Exchange Rates,BEER),根據BEER計法,CFETS人民幣匯率指數現時合理值應該係85,但而家係97.38,人民幣被高估12%條數係咁嚟。問題重點係,滙率係相對,呢刻計出嚟話高估12%,唔代表貶值12%就搞掂。期間若各國頂唔順再玩貶值,條數就會順住向下移。剛過去嘅星期日,產油國多哈談判失敗,凡係呢種冇大佬話事要各國自己拆掂數嘅談判,唔係三幾次可以傾得成,滙市亦一樣。貨幣戰下半場而家先開波。


Mr. Tregunter


Comments