[140507] 今日賺錢明天可以清盤

2014 年 5 月 7 日

方卓如 方如玉帥

今日賺錢明天可以清盤

用做生意的心態去買股票會有盲點,令你賺又賺唔盡,輸卻輸到突,生不如死。

過去一世紀全世界最大的洗腦係市盈率。佢話你知公司賺錢就代表值錢,值多值少就睇市盈率。公司賺錢當然值錢,如果你是大股東兼董事,只有你可以控制公司資源。

小股東眼白白睇見公司賺錢,睇得唔用得,如果唔派息,其實唔關你事。唔派息的股票其實是郵票,郵票都可以有價有市,唔使理市盈率。唔派息都得,小股東可以把公司清盤分錢,公司賺錢就關你事。

股票擇善固執分分鐘輸死

既然公司賺錢其實唔關你事,唯一方法,就是要有人用高過你接貨價錢接你貨,方法就是用市盈率,說服你公司賺錢等如值錢,愈賺得多愈值得多。

只要大家都信就冇問題,市場有個約定俗成的方法計價錢,全部都信,就可以把貨轉來轉去。股票同銀紙一樣,最緊要有人信,冇人信,銀紙都唔值錢,何況股票?

買股票當正自己做生意,好大件事。如果你有做過生意,生意人有種固執。你明明覺得這盤生意有得做,一時低落,你會頂。做生意就係有時要擇善固執,但買股票擇善固執有時會死,輸死。掉番轉,有時公司冇正經生意做,反而股票仲好炒,賣殼的可以升幾倍,正正經經做生意,時賺時蝕,十年都未必升到一倍。

做生意式買股票,幾十年前可能得,當時資訊唔發達,投資工具又少,大家識啲唔識啲,賺錢全靠鬥快知道公司發生什麼事。公司冇太多蠱惑諗頭,一心正經做生意賺錢。

現在?今日賺錢的公司,明日可以停牌清盤。

做生意還做生意,買股票是另一回事。

Comments