[140521] 最緊要知買緊乜

2014 年 5 月 21 日

方卓如 方如玉帥

最緊要知買緊乜

報載宅男神話「神魔之塔」有機會賣唔成,主要評論都是獲封宅男偶像的兩兄弟怕且見財化水。報章關注的都是當日高價出售的嘩然,然後空手而回、一切化灰的唏噓。

最高境界利用時機搵錢

究竟一單買賣,收購合併,買家是買什麼?搞清楚這問題非常重要,涉及買家肯畀幾多錢,以及單交易有多快可以成事。一買一賣,一個願打一個願捱,好少會死錯人。賣家賣什麼通常簡單易明,買家買什麼就大有文章。唔知買家買乜,好難指指點點究竟買得貴還是買得抵。

生意人眼中,通常是買生意。買得你,當然是睇中你的搵錢能力,就是想買完之後,一加一等如三,將生意做得更大,賺更多錢。通常平常人會話價錢貴,因為除咗你之外,冇人識計條數,應該連賣家都唔識。如果佢識計,肯定賣貴啲。所以,人家天價買生意,除非你肯定買家是名傻佬,否則他腦入面一定有條得佢識計的數。當然,亦有可能計錯。

專業人士眼中,你買係買資產。只有資產有得計,有合同可訂,他們可以有所依據。其他眼見不到的,他們通通覺得唔存在。每一件資產他們可以計到準一準,買貴買平一目瞭然。你有時會覺得他們囉嗦、細眉細眼,但就是因為他們細眉細眼才會坐到這個位;亦是他們的細眉細眉,有時救咗你,令你幸免於難。

科網人眼中,他們買的是時間同對手。他們毋須理會買回來的值幾錢,他們自己的生意都貴到連自己都唔信,一間唔值咁貴的公司去買一間唔值咁貴的公司,負負得正,正常晒。他們胸懷宇宙,只要有機會畀佢哋喺 50 米處起步,他們多兩秒就可以衝過 100 米終點。如果同時間用錢買走了隔離那個對手,想唔贏都難。科網買嘢買得特別貴,糅合了買生意、買資產、買時間、買對手四大元素。一個價錢買咁多嘢,抵到爛。

最高境界、最畀得起價錢,係買一個時機。這個時機,只可意會。時機到,多多錢都肯畀。但時機一過,幾平買番嚟都係垃圾。時機這東西最公平,買家賣家都可以利用時機,幫自己搵錢。時機一過,冇得怨。

Comments