量寬QE之後的量緊QT‎ > ‎2013‎ > ‎

[130218] 炒功

2013年 1月17-2月18日

炒功(1)

近排不少網友總結了炒股心得,我想抽小小空間講吓,網友buddaau早兩日話:「我真係出入太多, 都唔知自己搞咩, 剛買一隻股, 見低幾格又驚, 即沽, 見其他升幾格又追, 如是者, 啲錢就係沽沽揸揸中流走... 講起大飛機, 如果4蚊沽左, 我懷疑自己可唔可以坐定定等大市大插先撈番, 我驚到時又係出出入入輸晒... 好似尋日, 為左大豐哥竟然癲到投資倉既大飛機黎玩, 我之所以將投資倉擺係小五哥(匯豐銀行)度, 就係希望用佢高昂既收費, 壓制我既出入癲狂症, 點知尋日癲起上黎咩都唔記得晒, 咁就無左10隻牛... 依10隻牛係我投機倉好辛苦先追得番黎架(無錯, 係追唔係贏, 因為投機倉重蝕緊...), 咁就無左啦...」
 
平時睇Buddaau的留言,有紋有路,佢自稱「股海瘋人」,我都唔係好信,但睇番佢呢個留言,才知道佢瘋在那裏。絕大部份股民以為炒股要搵啱巴,搵啱一隻好股,盲目咁買入去就不斷咁升,咁佢就會發達。事實呢?好多投資陷阱,就針對散戶呢啲心態而來,俾個巴你,跟住殺咗你。關鍵唔係巴,只要個市得,好多巴都得,連唔係幾得的巴都會得,問題你炒股的心態得唔得。
 
投資要死坐,平買貴賣,一年好少進出。投機要補捉時機,跟風走一段,出入位和策略更重要。我睇Buddaau近日成日講八婆(3800保利協鑫),佢在3800跌到1.1元、1.2元時成日講,出出入入都有買,但一升少少就走咗,你睇而家幾錢? 2.13元,若Buddaau坐得定啲,一舖就OK啦。佢講的太陽能股、風電股好多都得,或者應該咁講,有一啲其他紅色股無升咁多,都升唔少,求得揀隻都得,問題唔係巴,係搵唔搵啱時間入市/出市,同埋唔好咁胡亂出入。
 
Buddaau話「見佢跌幾格」就驚,咁講第一顯示佢心理質素差,第二是無研究佢買那隻股升跌的韻律,第三可能係一直炒股的方法都錯,只是見升盲追,好多時盲追都係摸咗個小頂的時候。雖然股價圖唔太可靠,但買賣市值過100億的股票,都可以睇圖,睇下佢升跌的韻律,同大市走勢有乜異同。我去年中講的中國海外,當時就在一條完美上升軌之上,你每逢佢回落一定比例時去買都得,升一段又可以先沽等佢回吐,炒呢啲股較容易。
 
無論如何,我唔反對Buddaau繼續炒股,這是心癮,難戒,但要將較多資金放在投資倉中,唔好咁經常出入。至於炒作倉,放少啲錢,先諗諗我上面講的幾條,改變自己炒作的手法,減少盲動的買和盲動的沽,事前有部署,買入後會點,乜位止蝕,估吓佢跌番到止蝕位機會有幾大,沿圖型走勢運行會唔會跌番到止蝕位,部署好才行動,行動時按計劃,才會增加炒作的成功機會。若想成功,先練炒功。


炒功(2)

再講講昨日的「炒功」話題。網友buddaau再留言講佢點解咁顛。佢話:「其實我好記得幾時開始鍾意大大注買落去, 搏執幾個%就閃... 好似係09/10時, 當時我重係用電話落盤, 重要係唔使戶口有錢嗰隻, 想買幾多就幾多, 我當時唔知點解膽粗粗買左50萬中鐵, 唔使半個鐘就彈左上去, 咁就汁左三皮(3萬元), 嘩! 突然發覺啲錢係咁易賺.. 如是者, 食過翻尋味, 結果係點, 大家當然知道啦, 係嘔返突俾佢... 之後就唔敢再玩大刀切樹仔... 就算再賭都係相對小注, 因為大注一路買左大飛機, 而且因為轉左網上買賣, 戶口有幾多就買幾多..」
 
Buddaau再講:「如事者過左兩年, 雖然都係輸, 但係都係有限數... 點知係前日, 突然幻想大豐哥(利豐)會單日反彈, 竟然覺得投機倉太少錢, 贏左都無肉食, 就咁就走左去郁投資倉既大飛機(中航科工)... 入完重天真到即時SET高10%沽... 諗起都和咪呀... 之後佢一路唔係點郁, 而且重陰陰咁跌左幾格, 突然怕死, 即沽, 跟手合埋眼高追番晒大飛機, 作為心理補償, 重要追突... 好在怕死, 再加心繫大飛機, 之後大飛機就爆上, 損失先無咁大... 但係諗起都驚, 萬一無沽大豐哥, 又或者沽左之後唔敢追返大飛機, 就真係損失慘重啦... 而且真係會訓唔著...」
 
    Buddaau的故仔相當典型,第一,輸錢皆因贏錢起,當日炒股一日賺3萬,好過打工好多,那能不瘋狂,人受經驗影響,如果你一炒股就燒傷手指,你會養成較審慎的性格,相反如果一炒就贏,好易變「股神」。但大家可能唔知道一個簡單的現實,睇你邊年開始炒,如果2007年大牛市時起步,或在2009年3月大反彈市開始炒,你會發覺炒乜都賺錢,自然好想瘋狂去炒,瘋狂去贏(同而家炒樓差不多)。問題係不是年年都係狂升的年頭,呢啲在大升市贏錢的往績,可以叫做「盲毛往績」,因為夠膽炒就會贏。真正經得起考驗的是要經歷升市和跌市的業績,結果大部份人的炒法在股市一轉勢就唔靈,因為散戶以買股為主,市跌買股就中招。堅持用大牛市盲炒的方法在跌市炒,當然會輸突。
 
    第二,亂博反彈。炒作方法好多,有人順勢炒,搵有勢炒上的股份,一回落就揸; 亦有人逆勢炒,等股份急插時走入去博反彈。但博反彈唔係時時得,隻隻得,有股份本身唔得,在急跌時,每一次反彈都係打開一個逃生窗口,冷靜的持貨者就會等反彈沽,我就係呢種人,若手上股份遇上突如其來的壞消息,決定跳船,我一定不會在一開市不問價就沽,會等當日或後一日有反彈時才走。股份愈衰,反彈愈弱,你買入利豐博反彈,顯然不是分析其基本因素,只係盲炒,大跌股份必有反彈,但佢的問題愈大,反彈愈弱,因為好多人等住反彈沽,你想博彈10%走,佢可能彈5%再插過都未定,你無研究清楚就博反彈,若唔止蝕可以好傷。一般而言,炒順勢易過炒逆勢,除非你對個別投資產品的走勢及基本因素好有研究,例如我去年在逢日圓急升到76就沽,因為日本政府會在這個位干預,但這是例外,不是典型。
 
    第三.行為盲動。Buddaau當日盲毛毛將投資倉的中航科工沽掉,轉去投機利豐,一隻當頭起,一隻當頭跌,即使係短炒,都應該等當頭起股份回吐時買。佢咁急,只是盲信利豐可以好快彈10%,典型的唔經大腦一時衝動。
 
    結論係Buddaau話自己「瘋炒」係合理的,佢炒作手法相當不成熟,有點瘋。往後不可再動投資倉的錢。投機先學順勢炒,睇較大股份的股價圖,研究佢上升軌,等回吐時吸納,定10%止蝕,研究什麼位置食糊。小注成功,才可加大注碼。盲目發功,不會成功。


炒功(3)

我想再講講炒功的問題,從網友自報的成績看,大家的炒功尚有改善空間。例如Stockinvest話佢行年40,一家四口,包括一個1歲BB,月儲1萬,除卻間自住樓,資產是零,現金50萬,過去兩年投資回報是負10%。先講成績,這個成績跑輸大市,大市呢兩年未計派息累計跌1.6%,計埋約2.8%派息有微利(這是盈富基金的派息率),好過Stockinvest輸10%。
 
我可以俾過去7年的數字讓大家比對,這7年大市經過高低起伏,足以考驗一個人的炒功,2006年恒指收19964點,到2007年大牛市年底收27812點,全年大升39.3%,到2008年驚人大跌市收14387點,恒指大跌48.2%,到2009年美國大放水,股市彈升恒指收21872點,大升52%,到2010年升到水尾,收23035點,全年只微升5.3%,到2011年大陸緊縮,恒指收18434點,恒指跌20%,到去年由衰轉好,尾段開始放水,恒指收22656點,升22.9%。
 
        若由2006年底的19964點開始買股,到去年底收22656點,累計升13.5%,按呢6年平均派息2.8%計,加埋收息揸住恒指唔郁唔理佢大上大落,到去年底回報有30%。你對比呢啲數字,可以知道自己每一年有無跑贏大市。只是2007年和2009年贏錢,唔作得準,若6年累計到如今都是輸錢或累計回報少過30%,就係跑輸大市。
 
        炒股本來易輸,大市咁樣波浪起伏,更易輸。我覺得散戶的通病係「入場太遲,散場唔走」。即係大跌時唔敢買,唔熱唔去買,好似去飲食到炸子雞你先至入場,好快去到美點雙輝你自然未飽,跟住唔覺唔覺散場都唔知,仲磨爛蓆唔走,自然會輸錢。


炒功(4)

繼續講炒功的問題。昨日我叫大家比對過去六年大市表現和自己炒作的成績,若果成績唔好,其中一個主因是「入場太遲,散場唔走,好似去飲食到炸子雞先至入場,賴死唔走」,今日想講是令散戶出現這種行為的「怕輸心理」。
 
    網友YY太講自己的情況比我講得更趣,一定要引用一下:「我在識陸SIR之前(2006-7前), 買股三份一半是大股(但失敗是地產捨恆基, 買恆隆!!) ,其他是把股, 贏粒糖, 輸間廠。自己成日忙生意, 冇什麼專心學習看市.  識了陸SIR後, 學嘢慢, 心理質素差. 睇中了, 買之量太小 (不夠膽色及信心), 但往往是盛宴, 食到炒飯時才大膽入市, 不過食完美點雙輝都未走, 以為會有宵夜加場, 期望跟住會上燕窩,同三頭鮑魚. 最後都是一個人洗碗同幫走左的人找數!!!」
 
    其實YY太已有進步,因為買唔知佢做乜的三、四線   
把股,可以輸清。不過即使買大股,時機唔啱亦會坐艇,好似YY太咁樣「食到炒飯才入場」、仲以為有三頭鮑未上菜的散戶,為數不少。德國炒神科斯托蘭尼講股市,主要講股民心理學,有很大的道理在其中,好多人買股輸錢,主要係輸心理。
 
    股場上有少數人極爛賭,佢地日日走幾轉,係又賭唔係又賭,呢種人相對係少數,大多數股民並非如此,多數人唔係日日出入,佢地都算中線投資者,特性係「怕輸」。炒股易輸錢,怕輸好正常,所以股市就係咁,市道好差股票好便宜時,好少人敢買,因為當時市道異常兇險,好似會不斷跌; 相反市道好好股票好貴時,卻有好多人敢買,因為感覺好好,好似會不斷升。個市愈瘋狂,買意愈強,最後出現「我而家唔買呢世都唔會買到啦」呢種感覺,而家樓市就係咁。在兇險時離場,在暢旺時入市,完全是人類避險的天性驅動,但在股市就變成高買低沽。
 
    避險本來無錯,但股市的週期波動,有很多人為因素,恒指可以由2006年底至去年底,累計只升13.5%,但當中的上落大到嚇死你,可以在2008年一年跌48.2%,相反在2009年一年升52%,試想在合適時間進出,當然比死揸好。但現實剛好相反,好多人在最差的時間進出,所以炒股回報衰過6年升幅咁少的大市。
 
    要克服「怕輸心理」,第一,理性認識,無論如何要對投資對象有較多的認識,唔好人講你講。好以在2008年恒指跌到5800點時,有本雜誌封面大大隻字話會跌到3000點,我當時就唔信,話咁跌法跌多半年恒指可變零㖭,問題係很多恒指成份股還在賺錢,點解恒指可以跌到咁低? 所以我偏要在那時買股,結果遇上政府入市干預,一年後恒指升上18000點。
 
第二,避開風險股,我講的風險是會執笠的風險,在大跌中買股,唔應該怕佢再跌,因為佢好大機會再跌,正如股神巴菲特的比喻,股市大跌正如百貨公司減價,愈減愈抵賣。若是好股,買完再跌,即係五折變成四折,可以再買。但相反你買入的股票可能會執笠,就完全唔係呢條數。在跌市買股要買安全股,國企好過民企,唔識揀買指數股,公司會執笠,指數唔會執笠。
 
第三,分段低吸。其實如果睇到股票個底在那裏,不用分段,可以在低位附近大手入市,我自己買股就係咁,較少分段買。但對散戶而言,買完即跌好難受,分兩三注買,買完第一注會期待佢再跌買第二注第三注,心理完全不同。
 
日日炒即日鮮的老散,應該學吓要怕輸,相反在去年9、10月都唔敢入市的朋友,就要克服怕輸的心理,怕輸就應該在市旺的時候怕,唔係在市淡的時候怕。


炒功(5)

 延續炒功的話題,昨日講「怕輸心理」令大多數性格唔係咁進取的股民太遲入場,太遲離場。今日講另一種病變,係「誤墮炒網」,呢種病仲離奇,係唔諗住炒股,炒咗自己都唔知。
 
 我自己過去都有這種感覺,在股市升得唔錯,炒得香噴噴時,自己內心的另一個我告誡自己,呢啲炒作日子唔可以永續,唔好投機細股啦,轉去投資大股隱陣啲。哈哈,妓女不能從良,因為佢做唔慣良家婦女,唔識行情,炒開股的人懶係投資,但高價買入一些過熱的大股,其實同炒作無分別,但炒作佢會止蝕,投資又唔止蝕,所以墮入炒網自己都唔知。
 
 我睇好幾個網友總結買股往績,提到好幾隻股票而家都未到家鄉,最經典的是國壽(2628) ,國壽在2007年1月A股上市時開始炒熱,當年1月佢股價22元左右,同年10月上高峰53.8元,當時有人話佢值200元,08年大跌市時插到15.3元,2009年反彈市上過41.45元,跟住兩年反覆回落,而家彈返上26.5元。2007年咁顛的市道高追國壽無話可說,當時人人都顛,但國壽在2009年彈高慢慢落時,吸引不少「投資者」接貨,就害死唔少人。
 
    其實國壽的問題兩句話可以講完,「管理質素好一般,但股價太貴」。記得國壽2007年發行A股時每股作價18.88元人民幣作價,按照2006年盈利計算市盈率是97.8倍多,雖然潮流興講市盈率不是壽險公司合適的估值辦法,要睇內涵價值,但我始終會睇吓市盈率,佢上到53.8時,市盈率係233倍,同年國壽純利389億,增長95%,係歷史高位,所以用當年預測2007年盈利計,高位時預測市盈率都有119.5倍,真係年年都有95%盈利增長? 咁大間公司,估都估到盈利無可能維持咁高速增長,過百倍市盈率,點買得落手?炒就得,呢個係2007年的故事。
 
    國壽在2009年股價彈番上41.45元的高位,當年盈利329億,未去番高峰的389億盈利,真正問題是經歷了海嘯,就唔可以用當年的眼光和歷史的股價睇國壽,佢會唔會去番389億盈利呢? 佢2011年盈利183億,2012年中期盈利再跌26%得96億,由此估計2012年全年盈利多數要跌,到今天國壽股價按2011年盈利計仍有33倍市盈率,只得1.1厘息率,雖然我地估A股回升佢投資收期益會上番啲,但論價錢一啲都唔平,不過千祈唔好以為我話佢唔會升,佢在炒作市中可以再上,但投資價值唔高。
 
    在2010年,2011年,股民見股市回落,諗番國壽高位53元,有人講過話佢值200元,見到佢30幾元,覺得好低,甚至覺得安全,唔炒股轉去買呢啲大股,實際上係「誤墮炒網」。但在2010年買咗指數股,即使未到家鄉,但係有番咁上下派息,而且指數股番身機會較大,坐吓都唔使太擔心。但你30、40元買咗國壽,佢會唔會/幾時會上番呢啲高位,就難講好多。同樣道理,你買航運股,例如中國遠洋(1919) ,要知佢2007年賺194億,但2011年蝕緊104億,唔好見過中遠高位40.8元,就覺得而家3.8元平,航運業有排未復甦,而家係炒緊復甦,唔係復甦緊呀。
 
    無論如何,買股唔睇基本因素,可以係唔炒變咗炒,炒咗唔止蝕。

炒功(6)

    今日想講是炒股要順勢,特別係捕捉到一個大市或一隻股份轉勢,你在新的走勢順勢而行,即使你買的是風險較低的大股,都好易有20%以上的利潤。以蘋果為例,它是由一個長升的走勢,走入一個下跌的走勢中,去年9月佢上高位705美元後,就是佢轉勢之時,何時轉勢最難分辯,但其後開始急跌,轉勢開始明顯,第一個主要訊息係10月11日跌穿628美元,雖然只係跌咗11%,破咗上升軌,正常揸住最好走避,佢一路跌,反彈都唔大力,最多只係彈20幾美元,彈3、4%,唔彈得多。轉勢之後,蘋果的走勢係向下而唔係向上,順勢炒係每逢反彈要沽,逆勢炒係每逢大跌去撈,順勢易做過逆勢。
 
    記唔記得蘋果跌10%到620、630美元時,不少網友想撈,但我睇法都頗保留,主要覺得佢轉咗勢,逆勢難炒。即使去到較大反彈,你買咗都唔易走到,佢第一浪急跌的首個低位是11月16日的525美元,在穿上升軌時追沽,到呢個低位已有16%利潤。佢呢次大跌後反彈,10後反彈到反彈高點589美元,反彈12%,即使你見佢大插時撈底,有無好彩撈到525美元呢個低位呢? 因為佢股價走得好快,若非定位做,到你想撈,佢已經去番540美元樓上,你540美元揸咗,見佢升到580幾,10%都未夠,多數唔會沽,咁就中招啦,彈完再跌後,中間反彈有限,若540美元揸咗,如今仲要輸17%!
 
    蘋果呢個例子說明,第一,搵到轉勢位做嘢,會有較豐厚利潤,蘋果的沽貨位是佢在10月11日跌到628美元穿上升軌後,等佢反彈沽,最高彈到649美元,有機會在640美元左右沽到,然後等佢跌,選什麼價位入市沽佢有眾多考慮因素,其中一個是如何定止蝕,佢高位705美元,止蝕位最好定在呢個位之上,例如710美元買番平倉,640美元沽,710美元平倉,約輸11%,即係佢唔創新高唔使止蝕,比較安全。第二,順勢好過逆勢,在蘋果呢個例子,係每次等佢下跌後反彈20美元左右沽,有幾次機會食到。而唔係在大跌時撈,因為反彈唔夠多,無乜水位走。第三,有較深利潤時最好先食一部份,例如今次跌得幾深,若有沽倉先沽一半,留一半再睇,若揸住20%、30%在手,將沽空價或沽空價低10%或圖表轉勢向番上的位止賺,封哂蝕本門。找時機食部份糊,也是炒作要點,不要想食盡。你將蘋果的例子反轉,就是去年9月炒國企轉勢向上的例子。

炒功(7)

今日想再講炒功。炒股第一要務係要知自己在炒,唔係投資,唔好問埋那些基本到唔基本的基本因素問題,那些東西可以變成炒作的藉口,不會影響大局,真正影響走勢是短期的供求動力。唔好炒一隻股,到佢轉勢下跌時,仍然盲信人地早前炒股時講的長遠利好因素,揸住唔識止蝕。

        炒股第二要務是要有計劃。包括想賺多少,預了蝕多少,看看可不可行。好似網友Bibirain早前話「上星期在15.18 買左4500股960龍湖,諗住炒下,到15.6就放,依家跌到14.6, 好無耐,做足準備10%止蝕。後悔太心急。」Bibirain的炒法有好大漏洞,諗住食2.7%,止蝕有10%,輸一次要贏四次先至補得番,你條數計唔通,係典型的贏粒糖輸間廠。我估Bibirian可能見龍湖升緊,諗住入場搭順風車,可能想快到早上落盤下午就可以食糊,買貨時根本無諗止蝕(因為有諗的話,無理由咁唔合理),到買完調頭回落,才諗10%止蝕。假設Bibirain今次捱到唔輸,甚至番上去15.6元食到2.7%,佢下次又會咁炒。問題係方法唔好,長炒必輸,根本唔係吼唔吼得中好股,不是冧巴的問題,而是炒法有問題。你要10%止蝕,至少也要睇10%升幅,這才是1博1。你唔係對沖基金,唔使玩高頻交易,定好計劃,輸的次數少,贏的次數多,長線才會贏。

        炒股第三要務是先諗蝕才諗賺。睇中時錢會自動來,唔需要太擔心,睇錯時如何止蝕才是最重要,要定好止蝕,要減少止蝕的機會。好多朋友話炒股若定止蝕,經常要執行。我話這是你的問題,不是止蝕這個方法的問題,你入市位和時機不好,才經常要止蝕。所以我定炒股入市位,先考慮10%的止蝕位,盡量不高追,因為高追一回就要止蝕。等如熱門股回吐到咁上下,計下若到入貨價低10%時,遠在上升軌之下,即係話如果要止蝕,隻股已大幅跌穿上升軌,以減低止蝕的機會。若一隻股近期一直守住上升軌向上升,要突然轉勢穿軌向下的機會低少少,亦減低止蝕的機會。例如你24元買中國海外,10%止蝕係21.6元,佢跌到止蝕位,都要走啦。

你做足上面三件事,小心執行,應該可以輸少贏多啦。

炒功(8)

早前寫緊「炒功」的時候,有些網友提到止賺的問題,我並未觸及,而家可以講吓。先睇睇網友「勝不驕」的例子,佢話「上次待你評論我為『典型的敢輸唔敢贏,有機會詳談你的個案』(2013-01-23 11:29),我當時寫的內容如下:『陸Sir,總結上年,是學習止蝕、是輸得慘烈的一年: 輸保利協鑫3800(2.5元買,2元沽),買蘋果又輸(你寫了文章作為大家借鏡),兩隻都未能妥當止蝕,還有很多止蝕(得不好)的例子,見到勢好的恒地(0012) 、新地(0016) ,但驚巿況唔好,係平手($44,$94)沽出。有些股票選擇不止蝕(農行: $3.3買入,最低$2.8,保利協鑫$1.7,$1.3買入,最低$1.1)當時手持大部分現金。到去年12月,眼見巿好,開始all in(全部買入)。招行,人保,新華保險等,連同農行以及保利協鑫,現在有20至30%升幅。新華甚至越升越賣指數基金(2800、2823)即不多於10%升幅。回想今次all in 買股,自己持股太多(10隻左右,連埋那些一手股)現在開始研究如何止賺,以及賣掉一手股。所以經常問陸sir止賺。回想過去,其實買盈富基金(2800) ,可能好穩定地賺錢。
 
勝不驕的個案,第一個問題是無適當地10%止蝕,特別是買下跌中的保利協鑫或美國的蘋果時,要考慮好如何止蝕,才好入市。
 
如今他面對第二個問題,是如何獲利的問題。這是一個很複雜的問題,我會將之分開「投資的我」和「投機的我」來處理。若是「投資的我」買股,買入相對大隻的股份,目標是揸較長的年期,若是進入位較低,如去年在18000點、19000點入市,如今有20%以上的利潤,承受下跌的能力較好,本來也不一定要出出入入。不過,在美國量寛之後,股市的波動加大,即使是「投資的我」,若手持股票一股不郁,見住大市升升跌跌,揸一年都好易原地踏步,最叻都係收3幾厘息,所以郁動吓都無壞。我建議是趁高位減持三分一至三分二,沽多少隨風險喜好而異,通常是年初沽(即係而家),年中買(5月打後),有20%以上利潤可沽,等跌番10%以上買番(以大股計)。
 
沽貨的風險是遇上升過不停的大牛市,暫時睇而家的情況未係太似會咁,出現小牛市或橫行小小向上市機會大啲。即使係大牛市,因為無沽清,仲有三分一貨在手,都可以享受到,而你沽到一股不留,就要忍受沽完再升之痛。你會分到有些股份係大股,升極有個譜,沽得急咗無壞,有啲股份係中型股,如果買得平,有翻倍的可能,唔一定要咁快沽,即係可以坐吓,記住投資可以揸長啲。
 
投機的我唔同,流轉要快,有糊要食。我覺得勝不驕似呢類多啲(鐘意炒下跌股),投機唔可以俾自己輸,唔好捱價,更需要食糊。所以有20%利潤,老大沽一半,其餘一半以買入價止蝕,咁就一定唔輸,若以買入價高10%止賺,夾埋一定有賺。記住炒作之關鍵係令自己年年有正回報,唔好一舖輸清,所以如何止蝕或止賺,是控制食糊倉位唔好變食蕉倉位之關鍵。我有個朋友係炒匯高手,佢話俾我聽佢後生時一個經驗,佢以100萬開倉(5%按金,即係炒緊2000萬),有一排炒得好順,100萬好快幾個月變咗200萬,就心雄啦,倉位愈開愈大,以為自己係炒神啦,唔設止蝕止賺,點知一個浪打過來,幾日之間,200萬輸到變咗10幾萬,個倉著哂紅燈要追按金,佢捱到個市反彈打哂靶,只有20萬,佢話若設止賺,個倉剩150萬時可以走哂,起碼到本金位100萬都應該走,佢無走,就變到得「幾條毛」。
 
呢個朋友都叻啦,就由20萬炒番起,用兩年時間炒番上100萬,叫做翻本,玩咗3年要重頭來過,不過學到一樣嘢,佢以後落盤已定好全部止蝕及部份止賺位(通常先食一半),咁就輸極有個譜,兼且一開始要諗好退場部署,順勢可以賭耐啲,逆勢即刻閃,佢之後就不斷保持炒匯有正回報。

炒功(9)

上星期講如何止賺的問題,講到「貪勝不知輸」唔止賺可以倒蝕入肉的炒匯例子,網友myself有個應好精警,值得引述,佢話:「大部股票老手會話:『買股容易沽股難』,要正確沽貨止賺一定唔係容易事。例如陸sir所講既炒匯高手,佢100萬炒到上200萬,心雄唔在講,升到高位一定有好多利好消息跟尾,一定好多所謂專家見好唱好,要係個party大家玩到好high時,有得玩有得食又有美女滿場走時,要你好抽身沽貨離場你話幾難?不過佢之後兩三年可以20萬炒返上100萬,即賺左5倍,都算係萬中無一,現實係輸埋個20萬居多,特別係炒匯,用5蚊本去揸100蚊貨,只要睇錯跌5%就可以輸到渣都冇,你想等佢升返?sorry!你已經破左產,即使你睇中升返都唔關你事,好似前排買日圓就可以輸到上身,呢啲錢真係唔係一般人可以賺架。」
 
Myself講的完全正確,唔識止賺輸到入肉,好少好似我講的炒匯高手咁可以炒返上去,更多再炒結果只係輸到渣都無,所以那個例子「貪勝不知輸」那部份係通病,但「反敗為勝」那部份就係異數。
 
止賺之難,係大部份人無發達夢就唔去炒作,有發達夢想佢到時到候走真係好難,所以最好係定好方法才入場。有好多反對止賺的說法,例如「止蝕唔止賺」,「讓利潤奔跑」等等,因為買入咗好股,升少少就食咗糊,以後有大茶飯都食唔到,例如200美元買咗蘋果,200幾就走咗,唔知佢最後可以升到705美元。又例如幾年前30、40元買騰訊(700) ,升到50、60元好高興就沽咗,無諗過佢可以升到280元。呢啲都係過早止賺走哂雞的故仔。
 
問題係股王百中無一,雞股十之七八,當中有騙人股,有生意失敗股,有市場逆轉股,有生意唔錯但市場唔炒照跌之股,理性的方式是研究個股的情況,判斷佢屬於乜類別,估計佢生意的前景,然後才決定是否止蝕唔止賺,當中有好複雜的技巧,講就容易,做好難做到。若一旦判斷錯誤,買著雞股唔係好股,結果都可以好災難性。
 
股價好難估,即使內幕人也如此,騰訊主席馬化騰在2009年3月和投資銀行簽訂期權合約,收取期權金,向對手出售一個允許對方在兩年後以每股67.8元向他買入200萬股騰訊股份的權利,當時騰訊股價為55元港元。到兩年後要履行合約按價沽貨時,騰訊是192元! 你話買平咗幾多?馬化騰共做了4份共800萬股期權售股合約,以每股賣平咗100元咁去計,馬化騰唔見咗8億!
 
但唔好以為馬化騰係傻仔,佢呢個故仔除了告訴大家唔好信內幕消息之外,還展示第一個策略,分段減持,若你手上有好多貨,見價升何妨分段減持,即使賣平咗,你還有大量賺錢貨,若然睇啱股價真係跌,起碼套了部份現。所以我話散戶買股睇中大賺,第一個方法是部份減持,留部份再睇,若然你比較保守,買的又是大股,可以唔清倉,最多沽三分之二,已足夠食吓股市一年的升跌浪。
 
第二個方法是第一個的變奏,最啱買中一些暴升股,例如騰訊這一種以倍升的股份,是沽部份貨足夠收回本金,其餘部份全部是賺番來的,你若覺得公司有長遠發展前景,放埋一邊唔理佢,笑傲江湖,已保本不會輸入肉。例如你33元買騰訊,升到100元,沽咗三分一收回成本,其餘的就可長揸。這一個浪升一倍的股份都唔少,例如你在低位1.1元買咗保利協鑫(3800) ,見佢升到2.2元,怕大市回頭佢跟住回,何不先沽一半,其餘一半長揸?
 
第三個方法是定位止賺,例如高位回10%或15%就沽貨,這個策略比較適合一些升勢較穩定的大股,例如騰訊在09年3月低位40多元起步,一直升到2010年1月,基本上係完美上升,一直升到176元,當中好少有大回吐,若定15%止蝕,可以睇到176元,然後在回吐15%至150元出貨,當然不能食盡佢整個升幅,但食到一年的完升浪。也可以將分段減持和定位止賺結合,第一注先在急升時食,往後的定位止賺。
 
我比較贊成做事唔好去盡,唔好信哂各種分析,買可以買錯,沽可以沽錯,沽錯是沽得過急,沽平咗,但唔沽打回原型,都有遺憾。股和樓不同,樓好多時只得一間,只能做一個揸或沽的決定,股可以拆散來做,有好多空間,唔信哂某一種分析,咪拆三分一或一半去做囉。調過頭來,一個升市升完就回吐,你一股都無沽過,又好似白走一場。

陸羽仁
Comments