量寬QE之後的量緊QT‎ > ‎2013‎ > ‎

[131104] 睇錯利息

睇錯利息
2013/11/4 上午 09:30:34

聯儲局究竟幾時退市的問題雖然講到口臭,但有新料都真係要講講。上周五支持量化寬鬆(QE)的聖路易斯聯儲主席布拉德(James Bullard) 及反對的費城聯儲主席普羅瑟(Charles Plosser) 繼續堅持己見,投資者無所適從,但鴿派布拉德的講話其實有料爆。

 

布拉德話,聯儲局正被逼續漸要接受市場的反應:縮減債券購買規模,將推動市場息口上升的現實。布拉德稱,聯儲局今年夏首次暗示縮減QE逐步退市時,金融市場大幅波動,令聯儲局官員大感意外,因為他們已一再向公眾強調,加息與退市兩個政策是相互孤立的,即是退市不等如加息,他們以為能夠在縮減QE的同時,可以維持低息,推動經濟增長到一定水平,才開始加息。但事實卻係市期預期聯儲局收水,債券市場就會跟住崩潰,國債息口無可避免飆升,美國10年期債券息口8月時就由5月的1.6厘急抽上近3厘水平,股市亦跟住大幅波動。

 

布拉德指聯儲局正傷透頭筋,因為要麼使市場確信退市和加息兩個政策互不相關,要麼自己學會如何平衡退市及市場對利率政策預期的關係。事實上,在最近一次議息會議後,市場預期聯儲局退市決定會比此前預計的時間為早,美國10年期國債又再蠢蠢卻動,昨日升上2.6厘上方。

 

聽完布拉德爆料,我有幾點觀察第一,聯儲局竟然估唔到一話退市債價會大跌、利率會大升,可知市場走勢真係唔係咁易猜度。事後去睇,聯儲局諸公當時的睇法可能和債券大王格羅斯差唔多,格羅斯認為聯儲局收水債價會跌、債息會升,但債息唔應該升咁多,所以10年期債息升穿2厘後,格羅斯就話升勢不能持續,年底前會跌番落2厘,但而家已經11月快近年底,10年期債息仲在2.6厘,遠比2厘為高,所以聯儲局和格羅斯一樣睇錯市,而且係錯好多。

 

第二,聯儲局估錯的原因正正係將收水退市和加息分割,以為只是退市影響不大。但市場覺得影響好大,我估因為這是一個週期的逆轉,2008年時10年債息是4厘,今年5月時10年債息低位是1.6厘,這5年的低息潮,是由聯儲局先大減息再大放水所導致,6月時聯儲局話今年要開始收水,明年結朿量寛,暗示後年開始加息,一開始收水就是整個週期反轉的開始,而且要在一年唔夠的週期完成退市,不可謂不快。若我是一個債券炒家,由睇住而家聯儲局每月放850億成為債市最大買家,到明年完全唔買,我都怕國債大冧市,所以早沽早著。而且明知利息可能在兩至三年內上番去4厘的正常水平,而家偷步炒上3厘甚至更高,亦都好合理,債息轉勢之後應反覆向上,正好逢低吸納,所以債息支持力強,好難回吐太多。

 

    第三,聯儲局面對這種局面的選擇是二選一,想市場同意聯儲局話退市和加息分開,唔好大家唔好咁睇淡國債,只是弱智的想法。所以明智的做法是接受一退市利息會更高的現實。若然如此,我又真係好懷疑聯儲局係唔係想咁快退市,假設一開始退市利息再上至3.5厘,經濟承唔承受得到若然此假設正確,聯儲局退市會退得比預期慢啲,今年12月未必會開始。當然,大家要留意這是鴿派放的風,要打少少折扣。

 

美股連跌兩日後,上周五反彈。杜指早段先高後低,但跌至15550點已見支持,收市回升70點至15616點;標普500指數漲5點,收1762點。

 

股市略見喜色,主要原因係美企財報普遍比市場預期的好,至目前為止,在已經公佈財報的368家標普500成分股當中,有53%的公司銷售收入超出預期,盈利超出預期的則有75%

 

頂住大市回落的另一個因素係市場普遍預期大市強勢會延續至年底。至於明年如何,就要睇番聯儲局的貨幣政策動向。有分析員指出,標普500指數至今已大漲超過23%,在過去50年,標普500指數能夠在前10個月就大升超過20%的只有出現過4年,而這4年的11月及12月,大市都係繼續向上,因此估計今年的走勢都會係咁。

 

隨住隆冬逼近,有個板塊,值得留意下。有老外分析員發報告,指北極振盪(Arctic Oscillation)今年呈現反向變動(negative phase)。所謂北極振盪,指北極的氣壓與北半球中緯度地帶的氣壓關係,呈反向變動,表示北極將會比較溫暖,而北半球中緯度地帶會變得較往常寒冷好多。

 

而天然氣交易員卻似乎未有留意這個氣候反常變化,以及對天然氣股的預期。該分析指出美國天然氣存量已經跌低過5年平均存量。而天氣較往年寒冷將加快天然氣消耗,從而推升天然氣價格。美國天然氣價格現時為每千立尺3.5美元至3.8美元。不過,由於天然氣價格上漲,會激發生產,價格唔會漲得非常高,預期會漲至4.5美元至5美元範圍,漲幅超接近三成,相關股份應該有唔錯升幅。取暖需求大增,國內的天然氣股、煤炭股也值得留意下。

 

陸羽仁

Comments