量寬QE之後的量緊QT‎ > ‎2013‎ > ‎

[130113] 借錢投資 散戶難為

金融High Tea——借錢投資 散戶難為
2013-01-07

內地股市上周五在新年假後開市,並沒有如外界預料那樣大紅盤高收,只是先跌後彈,收市微升0.4%;港股本來已想回吐,即刻借勢回調,但內地股市亦唔係咁弱,恒指上周五只是微跌67點收場。

        有網友sleepsheep1225問起我一個借錢投資的問題,我想同大家分享一吓,所以在這裏詳細回應她的問題。

        sleepsheep1225話:「陸Sir你好!一路覺得你既眼光犀利,風格務實,而且非常好人有問必答,果啲乜嘢大行分析咩專家都同你差左十萬八千里。不過因為我同老公一向都比較保守,每次睇陸Sir推薦的股票都只買一兩萬,而家最高峰股票帳戶都係得20幾萬,其他買基金或人仔做定存。最近覺得在而家水浸情況下,太過保守真係好笨,考慮緊比較激進的策略,將層樓二按,或賣咗樓套現出來投資,想陸Sir俾吓意見。」

        「我層樓3年前200萬買入,而家市值約400萬,欠銀行120萬。如果二按,可以按多大概70萬,每個月供多2000元,對生活基本冇影響,一個星期攞到錢,全部投入買A股,按照你估算15倍市值3200點左右,都有30%可以升,風險應該好小。」

        逢買必贏 加按開大

        「如果(賣樓)套現,還畀銀行之後有280萬在手,保守啲將一半存人仔定期,5厘息有7000元,加而家每月用7000元供按揭,夾埋足夠14000元,可以租間大啲屋住(而家500呎住埋阿媽同BB仔,有啲唔夠);一半買A股,理論上好有可能可以賺多1倍,又可以住得舒服啲,但需要搬屋同埋有風險,過多幾年可能買唔返間屋。唔知陸Sir會點建議?我地兩公婆月入約7萬,有個8個月大的BB。由2007年開始投資股票,自己好少研究,主要聽陸Sir同埋阿爸講股,基本上無蝕過,但都係(投資)銀碼較細,到而家加埋只係賺幾萬。」

        sleepsheep1225讚我的說話我受晒,特別係「風格務實」那一句,因為我都唔可以日日俾到一個冧巴大家去炒股,如果連「務實」分析做唔到,真係乜都無囉。

        我睇sleepsheep1225的提問,覺得她已經非常幸福,兩公婆月入7萬,有個可愛小BB,自己有樓,最最最幸福的是買股票「基本上無蝕過」,MyGoddess!(我的天)係「無蝕過」,雖然佢話自己買得少,最高峰只係買20幾萬,「到而家都係賺幾萬」咁啦,但你知唔知在股市呢個龍潭虎穴,想唔蝕錢已經好難啦?

        所以我第一樣嘢想講的是sleepsheep1225要明白,幸福不是必然的,要好好總結贏錢經驗,而唔係當贏錢做好容易的事,貿貿然瞓身買股大冒險。

        但我想寫篇文去回應sleepsheep的問題,唔係因為佢太幸福,而係因為佢想用層樓二按去買股。佢話二按「可以借到70萬,一個星期攞到錢,全部投入買A股,按照你估算上證綜指15倍市盈率值3200點左右,都有30%可以升,風險應該好小」。

        佢的問題可以分成兩個層次去討論。第一層︰上證綜指會唔會升到3200點?如果升會點升?若唔升會點跌?第二層︰即使上證綜指會升,係唔係應該攞層樓借二按去買佢呢?

        預股市升要防佢跌

        先講第一層,佢話我估「上證綜指15倍市盈率值3200點」,這句話的來源是源自早前一個網友的提問,我對那個網友的講法給予肯定答案得出來,借此去表明上證綜指唔貴,但並不等如我認為上證綜指會馬上升到這個水平。如果你問我3年內上證綜指會唔會見3200點,我都幾有信心話有好大機會會見。但如果你問我今年內上證綜指會唔會到3200點,上證綜指上周五收報2276點,若然升到3200點,唔止升30%,係升40%,我會話唔係無機會,但唔一定,而且當中仲有上落風險,所以我唔會好似sleepsheep1225咁講升到3200點「風險應該好小」。

        試想想如果上證綜指未見底,而家彈一輪,然後掉頭再試底,跌到1800點才見底,即係話先跌20%,而且跌緊的時候好恐怖,好難捱,你並唔知道1800點是底,你頂唔頂得順先?至少可以咁講,上證綜指1年內升到3200點同先跌落去1800點再升,機會都差唔多,都有20%至30%機會,不可不防,不能只估佢升,唔估佢跌,仲好似升梗咁,話「風險應該好小」。

        我是中國經濟睇好派,認為中國的增長會放慢少少,但未來8年都會向好(唔係人人好似我咁諗),所以上證綜指即使跌到1800點我都唔會驚,仲會買多啲。sleepsheep1225話明「自己好少研究」,到跌市時自然又會人人唱衰,我怕佢未必頂得順喎。所以呢一層對上證綜指的分析,是現價雖然仍然算便宜,但未必會一條氣咁升上去,中間會有波折,甚至有再尋底可能,不宜一面倒樂觀。

        第二層分析涉及借錢問題,sleepsheep1225想攞層樓去加按借70萬,或者賣咗層樓套現租大啲屋兼買股。樓市處於大牛市中,賣樓本來都可以,因為佢可以租大啲屋自己住得舒服啲,但要預咗樓市牛市比想像中長,賣咗自住樓要長時間捱較高租金,不過呢啲仲係在可控範圍,可以自行考慮,我對你賣樓無太大意見,但係對你話要加按層樓去買股,我就唔係幾同意。

        道理主要係「財不入急門」。自己有多餘錢去買股,手風順就等收錢,手風唔順但只要買的東西有質素,係未來增長前景較清?的大股(如指數股),手風唔順時都可以守,抱着「我唔信唔可以坐番你上去」的決心,收吓息坐吓貨,都好大機會守得雲開(雞股千祈咪試,一唔掂就要走)。但如果你係借錢嚟買股,邊有能力去守?

        年頭高位 五月低潮

        而且你想借錢買股時,多數係利息較低、銀行水浸、股市較旺時,我後生時有咁樣經驗,我當時自己有錢交稅,基本上不用借稅務貸款,但有些年份覺得個市好好,借盡佢去買股時,偏偏就係呢啲情境,買股就唔係幾得,可能和年頭個市過熱有關。相反在一些銀行質錢俾我我都無興趣借的年份,往往卻是買股可以賺錢的年份。唔知今年係唔係好多人借稅貸炒股呢?

        我唔想借錢買股,和兒時經驗有關。我細個時見過一個幫我爸爸做經紀的哥哥,借孖展炒股,由幾萬元炒到幾百萬身家(我估等如而家有幾千萬),最後個市大跌,佢倒頭欠公司兩百萬,結果還唔到債,唯有拋妻棄子,逃亡到南美。我一直深以為戒,唔鍾意借錢炒股。唔係借錢炒唔會贏,係愈贏愈衰,你愈係贏錢,就會愈借愈大,唔炒到爆都停唔到手,一朝發達,誰有定力離場?

        我俾sleepsheep1225的建議係唔好將層樓加按買股,要預備利息有回升的一天,那時又「剛好」是股市下跌的時候,因為兩者是有關的。同樣她要知道買股不是實贏,也會有輸的時候,要預咗輸的時候如何應變。更重要的是買得少,可比較抽離,又不用常常出入,我在去年第二季股市最衰時開始叫人買紅色股,你聽咗我講,揸到如今可以賺錢,你用好少錢投資會無咁緊張,反而易坐得定可以贏錢。但到你借咗好多錢,放100萬入去炒時,會好緊張,坐唔定,低買可以於更低位沽咗,唔易賺錢,所以最好逐漸加注,並維持小錢投資時的風格,低買坐一段,高位要獲利。

        最後想講股市有節奏,但近年略受美國放水的影響。基本上是年頭2、3月有高位,到5、6月差啲,到9月後又好番。睇番過去3年都有類似走勢,美國若停止放水(2011年6月第2輪量化寬鬆到期),股市會跌得更深更長;若持續放水,股市調整幅度就無咁大。這個每年高低起伏的節奏有原因,特別港股在2月底3月出的全年業績,是股票好消息集中表現的時刻,炒完業績派埋息,股市好易回;到9月出半年業績,又可以炒番上,所以年頭睇個市好,唔好太心雄,雖然美國放水加中國轉勢,但都不宜太單向睇好,反而等2月左右炒高啲時減啲貨,有機會在第二季以較低價錢買番,記住在股市賺錢唔易,要長玩長有呀。

        陸羽仁
Comments