[120914] 無限QE

無限QE


    美國聯儲局決定出招搞QE3(第三輪量化寬鬆),而且係非常進取的一種,因為聯儲局宣在每月用400億美元購買按揭債券,但計劃沒有限期,直至美國勞工市場顯著改善為止,更聲言即使經濟復甦但就業未恢復都會繼續下去。今次伯南克唔只係開支票,係開出無銀碼的無限大支票。美元聞言即跌,黃金、商品升1%以上,美股杜指大升206點,即使想炒好消息出貨者都要收手。
 
睇睇聯儲局搞乜。聯儲局昨日於息會議後宣佈一系列政策,除了將超低利率期由原來話的2014年底延長至2015年中,正在推行的「扭曲操作」維持不變外,更決定搞QE3,將由明日起每月購買400億美元的抵押貸款支持證券(MBS) ,直至失業率「顯著改善」為止。若一直QE到2015年底,聯儲局將再泵水接近1萬億美元入銀行體系,以挽救勞動市場(現時已近3萬億,自2008年開始QE多泵了2.1萬億)。計埋聯儲局現時每月將750億美元資產短債變長債的「扭曲操作」,以及將到期回籠資金再投資的操作,當局每個月購買的美元資產唔止400億美元,而係1000億美元。
 
QE3其實已在市場預期之內,只係幾時推出而已,甚至有不少分析話若聯儲局推4000至6000億元的QE3,市場已消化呢個消息,所以一公布股市就會獲利回吐。不過聯儲局推出的QE3遠比市場估計的進取,做幾件過去唔會做的事。首先,計當局講到明無限期,QE3將持續到美國就業市場有明顯改善為止,即係話,美國失業率一日唔大幅下跌,QE3一日唔會停止,同以往的經濟刺激計劃,有一個明確數額和明顯結束時限好唔同。有數額就易消化,例如我炒匯,估你印多幾錢,美元大約跌幾多就夠,而家計唔到。
 
第二計劃講明只針對推高就業。這不單在美國史無前例,在全世界央行的量寛鬆計劃都無一個係咁樣,仲話要「失業率顯著改善」先會停,乜叫「顯著改善」?而家美國失業率係8.1%,起碼要跌到7%以下才可以叫顯著改善。
 
第三,講明QE不是和經濟疲弱掛,即係話即使經濟改善但失業率唔跌,都唔會停止量寛。聯儲局的聲明仲對美國經濟講得好正面,話經濟活動幾個月以來都有溫和擴張,消費開支繼續增長,但商業固定資產投資放慢,長期通脹預期平穩。聯儲局咁講自然生起「經濟咁好使乜QE」的問題,官方答案係「就業差」。真實情況可能係經濟唔係咁好,但聯儲局怕講得差會沖淡QE的效果,所以講經濟講得正面而矣。
 
    聯儲局而家對美國未來經濟前景係咁估,就業市場到2014年會較大改善,失業率會由聯儲局在6月時估的7至7.7%,調低到6.7至7.3%(在QE的幫助下),到2015年,失業率會跌到6至6.8%。經濟增長方面,明年會增長3%,2014年會增長3.8%,先前估計分別係2.8%同3.5%。
 
    聯儲局今次呢個無限QE兼和失業率掛的手法,的確出人意表,市場也要時間消化。雖然每月400億,要去到第二輪QE 6000億的水平,都要去到明年底,而上次QE在6個月內就用哂6000億,不過今次QE勝在無底,你好難同佢對賭。
 
    我之前話過,今年11月美國大選,美股似有無形之手托住,如今聯儲局出招,更是有形之手出場。美國過往的總統大選,現任總統大多數可連任,但卻從未有一位總統能夠在失業率高於8%的水平下可以連任。美國失業率現時係8.1%,
奧巴馬有危,但聯儲局主席伯南兄在適當時候出招,推出的刺激方案史無前例地同集改善失業率掛,變相叫選民唔使擔心失業率,係唔係有「神祕力量」在背後推動,引起市場無限惴測。大家留意奧巴馬的選舉對手羅姆尼有乜反應,可以估到個中玄機。羅姆尼睇非常慶,重申話如果佢連任在伯南克2014年頭任期屆滿時唔會同佢續約。佢仲話印更多銀紙,會帶壞處多過好處。我就話奧巴馬得伯南兄之助,股市樓市升,美國人搵工希望大,奧巴馬連任機會大增。
 
        至於QE3會唔會成功,無人知,會有兩個可能結局,一個是推低美國失業率勝利收兵,另一個係未推低失業率都搞出驚人通脹被逼收工。美國後果難料,但全球資產和商品又起炒風。
 
美股受QE3刺激,中午後大幅抽升,杜指最高大升超過240點,尾市略為回順,收市仍升206點至13540點。升市火車頭係金融股,美銀升4.8%,摩根大通及美國運通升超過3%,係表現最好的三隻杜指成份股。美國咁樣印銀紙法,我又係那一句,小心港股都會繼續出現討厭式升市。
 
另一個市場焦點係蘋果。該公司推出最新智慧電話iPhone5,巴克萊資本將蘋果公司目標股價由750美元上調至810美元,預計蘋果推出iPhone5將取得成功,還期待蘋果今年秋季晚些時候推出其它主要新産品。蘋果再升2%至682.98美元。
 
陸羽仁
Comments