量寬QE之後的量緊QT‎ > ‎2012‎ > ‎

[121122] 如何看待股價浮沉

網友GoodEgg的提問,佢話:「譬如一隻股 (國企,相信無得執笠果隻),往績息率5~10%,當時買入價$10,買入至今,合共收息 $2.8 (28%),多年來股價高低浮沉,最高$15,最低$5,我開始檢討︰

1. 多年下來,收息$2.8;

2. 每當股價(由成本計)跌多過$2.8,我便擔心股價一沉不起,永不回升;

3. 每當股價回升高過$10,我又覺得自己「價、息兼收」十分開心;

4. 期間心情隨股價浮沉,大起大落,到頭來不知是賺是蝕;

5. 自問實在無能力估計公司前景,目前唯一可知的是公司派息相當穩定、滿意。

 請問︰

1. 我是否應只看派息,忽視股價波動呢?

2. 我可否把收息當成供保險----每年供5-8%,持股3年當供了3年,再供多七、八、九年……成本終有一日歸零,到時股價即使只值一毫,也是凈賺)

3. 其實,這種投資思路是否合理可行?若是一開始就屬「原則性犯錯」,是否應止蝕走人?

4. 現在,股價又跌了。我真不知道︰這樣的投資到底是「賺了」還是「蝕了」?有無方法評估計算呢?

 最近看了一則新聞說 1919中遠控股將不會得到國家支持,可能因連年巨虧而被逼退市……」

我忽然驚覺所謂「國企,相信無得執笠」可能只是一廂情願的想法。

     股市浮沉,網友GoodEgg有此困擾,實屬正常,佢講那隻國企買入10元,最高15元,最低5元,佢無講現時股價,可能低過入貨價,所以才有此疑問。我估我亦可以一層層咁答。

第一,問自己係投資定投機。若是投機,若買完即升,應在回吐到購入價時止了賺。或者買完即跌,跌到10%就要走,投機唔可以變投資。

第二,若是投資,真正要睇股份係唔係可以作長線投資的對象,要睇佢會唔會執笠真是一個關鍵考慮,若然唔識揀,不如買指數基金。你可能會話,若在上證綜指3000點時買了A股基金,而家都唔見三分一喎。的確係,但指數唔會執笠,若指數成份股大走樣,遠未到執笠,都會踢出成份股行列,所以乜都會執,照計指數唔會執。

長線投資的確要揀唔會執的公司,國企好過民企,但唔等如唔會執,例如你提到的航運股,就唔係絕對安全的類別,所以你從會唔會執笠的角度,四大國有銀行肯定好過國企航運股,因為內銀股若執笠影響整個金融改革,但航運股若面對70年代那種長衰退,可以衰10以上,真係大航運公司都可以執,就算唔執,跌到變零頭都死,亦睇唔到阿爺非救不可。

第三,股價可以唔睇,公司經營狀況一定要睇。股價可以由15元跌到5元,若然盈利無大變,或是盈利倒退都在合理範圍,亦維持相當派息,的確未必需要太驚。公司有無能力派息,特別係有無能力派較高利息,係公司財務是否穩健的重要指標,若你話間公司維持到510厘的派息,公司應該唔太差,可以揸吓。若然派息急跌,就要考慮跳唔跳船。因為公司經營狀況轉差,若無新資金入,跟住週轉不靈,可以玩完。

第四,複式投資回報高。若然你係投資,公司股價唔好生意尚可,維持到較高派息證明現金充裕,的確不一定要太著緊股價,除非公司經營顯著惡化。若然唔理股價,都可以處理下派息。按「七十二律」,若每年派息10%,你用股息再投資,若股價增長和派息成比例,7.2年股價就可以翻一翻,雖然股價短期不一定反映盈利或派息,但我看長遠會反映出來,所以收到息唔好食咗佢,投番入去,特別你講隻股咁高息,複式和單式(即取走股息)投資,長線效果差好遠。

           雖然GoodEgg無講俾我聽佢講的是什麼股,但你睇完我的回應,應該知道,長線投資者重視投資對象的生意狀況,多過股價的起落。你要記住,你長線投資一家公司股票,等如和大股東夾份做生意。至於短炒,只等如搭人順風車走兩個街口,兩者大不同也。


陸羽仁

Comments